الجامعة مو صج !!!ـ

السلام عليكم

شلونكم ؟ وشخباركم ان شاء الله تمام ؟؟

كل عام و أنتوا بألف خير بمناسبة العام الدراسي اليديد

مادري شنو أكتب و الا بشنو أبدأ !!ـ
بصراحة إذا الجامعة جذي .. شلون الناس تدرس ؟؟
من اللي شفته مرات أقول ما أدرس و خلني في مكاني أبرك
ومرات أقول لا أبي أحقق طموحي ولو مرة في حياتي
صارلي سنة و نص و أنا أسأل عن جامعة زينة و ألقى فيها القسم اللي أرتاح فيه
طبعاً أنا أتكلم عن الجامعات بالسعودية .. مو بالكويت
و الحمد لله توصلت أن الجامعة العربية المفتوحة أنسب مكان أدرس فيه
دخلت النت أدور معلومات عنها و أسأل صديقاتي
قررت أني أروح بنفسي للمقر عشان أشوفه و أقدم على اختبار تحديد المستوى
دقيت على رفيجتي أم مريم عشان توصف لي عنوان مقر (أ) اللي أنا خابرته قبل
جان تقول خبرج عتيج ترى نقلوا المقر (ب) بالمنطقة الفلانية ( عند البحر) آخر الدنيا
ولللليييه .. شلون الحين ؟ قالت روحي بنفسج و راح تلقين المقر أكبر من اللي قبله
أنا فرحت عبالي مقر أكبر يعني بيكون أحسن و أريح من قبل
رحت مع أبوي الصبح و دشيت المقر (ب) و بيدي أوراقي و الا ذاك اليوم عندهم امتحان
و الدنيا زحمة و كل وحدة نفسها بخشمها و اللي اطالع بنص عين و اللي علامة تعجب كبر راسها !!ـ
هوو يا حافظ يايتكم من كوكب ثاني ؟؟
البنات قاعدين على الارض بالممرات !! و الممر أصلا ضيج ضيج
المهم أتلفت و أسأل وين مكتب الإدارة .. و أخر شي وصلت له بعد لوعة جبد
أطق الباب محد يرد .. جان أدرعم عليهم خو مالي خلق أنطر لما حضرتهم يتفرغون لي !!ـ
و الا شنو أشوف ؟ الموظفات فارشين الريوق على المكتب ما شاء الله
و داقينها سوالف ..
بدال ما أقولهم السلام عليكم بقدم أوراقي .. قلت عوافي أييكم بعد شوي !!ـ
المهم استحت وحدة منهم وقالت تعالي شعندج ؟
قلت أبي أقدم جان تقول طبعتي ورقة التسجيل من النت ؟ قلت اي كاهي وياي
قالت خلاص تعالي الشهر الياي أختبري مو الحين !! ـ
متى الشهر الياي و أي ساعة ؟؟ قالت اتصلي قبل لا تيين احسن
و هذا رقم المقر و يمكن خلال هالشهر ننتقل مقر ثاني لأن هذا مقر مؤقت ..ـ
ياربي ما صارت مؤقت و مقر يديد كل شوي !!ـ
المهم .. و اذا تغير المقر شلون أعرف تليفونهم ؟

قالت هذا تليفون الدكتور فلان اتصلي عليه اذا محد رد عليج بالرقم اللي قبل

و هذي ورقة فيها الأشياء المطلوبة للتسجيل ..ـ
قلت أوكي مشكورة .. وطلعت
بعد شهر أدق على هالمقر .. محد يرد .. و الا محول فاكس
أدق على الدكتور .. هذا الرقم غير موجود بالخدمة !!ـ
يعني شنو ؟ شسوي بالله ؟؟ دشيت النت و على موقع الجامعة أفتر أدور معلومة
وكل واحد كاتب شكل ..ـ
بعد فترة شفت وحدة في مكان عام و كنا نسولف عن الدراسة جان أييب لها سالفة الجامعة ..ـ
جان تقول الجامعة خلصت أمتحان القبول من زمان !! أنتي وينج ؟
أنا هني مت من الحسرة .. ليش يسون فينا جذي .. بلعتها موس و سكت
عقب رمضان و بالتحديد ثالث أيام العيد دشيت منتدى الجامعة و سجلت فيه
و كتبت مشكلتي و طلبت من الأعضاء يردون علي بحل مناسب لها
و الحمد لله أول شي طمنوني أن الأوراق اللي معاي تمام وباقي ادفع فلوس الأختبار و أختبر بالمقر .. و راح يكون الأختبار يوم السبت 11-10
يوم الجمعة بالليل و أنا أستعد للاختبار و أجرب اختبارات انجليزي بالمواقع

دقت علي رفيجتي و قالت لي أن مرت اخوها علمتها بالمقر اليديد (ج)ـ

و راح ينتقلون من يوم السبت إلى هناك و قالت لي اسم المقر و بأي منطقة
بس أنا ما اقتنعت .. لأني ما أبي اطق مشوار و أفتر و بالاخير يقولون لا ما نقلنا

المهم من الصبح طلعت مع أبوي و معاي أوراقي و على المقر القديم (ب) ـ
تفاجأت أن في زحمة سيارات كالعادة و بنات نازلين و طالعين
جان أمسك بنت و أسألها : ها بشري عسى اختبار التقديم هني ؟
قالت : لا الإدارة انتقلت للمقر اليديد (ج) بالمنطقة الفلانية
و يلا شورانا خل ندق مشوار نص ساعة على ما نوصل للمقر هذا
مشكلة أني ما أدله عدل .. عاد أبوي أتصل على واحد من ربعه ساكن بهذيج المنطقة
و سأله و علمه بالتفصيل العنوان كامل وما قصر .. جان نوصل المكان (ج) ..ـ
المبنى مكتوب عليه مدرسة (...) رياض أطفال و تمهيدي !!ـ
دشيت و اشوف البنات يدشون المبنى اللي داخل .. سألت وحدة وين المدخل قالت هناك ..ـ
رحت و دشيت المدخل و افتر كلن مشغول و الامهات حوسة مع عيالهم !!ـ
سألت وحدة من الإدارة وين إدارة الجامعة جان تقول تعالي وراي
و أمشي و أمشي و الا طلعنا برى المبنى .. جان تقول هذاك الباب دشي عليهم
و أروح أدش ذاك المكان و الا مو مبنى بس دور أرضي جنه بيت حارس
الغرف مقاس 3×3 متر و أصغر و الممرات عرض متر و ربع !!ـ
و المشكلة أن البنات متربعين بالأرض وبهذا الممر الضييييييييج
البنات برى المكان هذا و داخل مادري شلون أشكالهم
هي تساريح !! هي مكياج سهرة !! هي عبايات غريبة !! هي نفسيات مادري شلون !!ـ
طبعا أنا داشة عليهم غير لا مكياج ولا تسريحة و الكل يطالعني بنظرة غريبة
قمت أفتر من غرفة لغرفة .. أسأل البنات وين الإدارة ؟ تقول مناك
أدش الغرفة و أصف دور من الزحمة و اذا وصلت للمكتب و قدمت أوراقي تقولي الموظفة .. حبيبتي روحي الغرفة الثانية انتي مو هني تقدمين !!ـ
وكل غرفة جذي و تميت على هالحال ساعة من غرفة لغرفة أنطر دور
و كل شوي أمر بالممر الضيج و أخطر هالبنات اللي متربعات يعني زين ما أتكرفس
و اللي تدز و تقول أووف و اللي تنافخ معصبة و اللي طايحة سوالف و معطلة الناس
المهم مردي للغرفة الأولى اللي دشيتها جان أصف دور بالزحمة
و ما أبالغ إذا قلت لكم الغرفة 2.5 × 2.5 متر و فيها ثلاث مكاتب و ثلاث موظفات
و البنات عد و أغلط من الزحمة و الأشكال غلط من الحر
لا و أزيدكم من الشعر بيت .. المكيف مخترب و الجو عجييييييييييييب
صفيت دور ليما دخت و وصل دوري جان اعطيها أوراقي بسرعة
شافت الأوراق جان تقول : الرسوم ناقصة !! قسيمة الإيداع مكتوب 250 ريال بس
شلون ناقصة ؟؟ انا ماخذة منكم ورقة مكتوب أن لازم أدفع 250 ريال حق اختبار التقديم !ـ
قالت لا .. لازم تدفعين 300 ريال ..ـ
من متى هالكلام و شلون أسويها ؟؟
قالت ردي للبنك و سوي ايداع بـ 50 ريال و تعالي مع قسيمة يديدة !!ـ
طلعت من الغرفة مقهورة لباب الشارع و ركبت السيارة الساعة 11 الظهر
قال أبوي بشري عسى اختبرتي ؟؟ قلت لا اختبار و لا بطيخ و الفلوس ناقصة
قال خليها العصر أمر البنك وأسوي لج إيداع ثاني و أمرنا لله
خصوصاً أن خواتي بالمدرسة بيطلعون مبجر و لازم أبوي يمر ياخذهم
و أحنا بعيدين نص ساعة بالسيارة عن مدارس خواتي
رديت البيت بعد ما كنت متأملة أسجل بأول يوم
وكل خوفي المواد تخلص وأنا ما لحقت ألتحق بشعبة معاهم
لأني سمعت الموظفة تقول للبنت الجدول متغير و مزحوم و المواد قليلة
و أي شي تبينه دشي الموقع و جيكي على الجدول و الساعات و الوقت

أنا باجر الأحد بروح المقر مرة ثانية و أتمنى أكمل إجراءاتي
ياربي توفقني و أدش القسم اللي أبيه ..ـ
وتوفق كل مسلم اللهم أمين

لا تنسوني بدعواتكم

شيخة .. و التـيـل

السلام عليكم
شلونكم .. وشخباركم .. اشتقت لكم حيل
و أدري بالشهر الفضيل كلن مشغول بالعبادة
و حبيت اليوم أطرح بوست قبل ما أنقطع فترة العيد
و لي رجعة إن شاء الله مع بوستات يديدة

= = = =

شيخة ترحب بكم من جديد

= = = =

مع طلعة شمس يوم الخميس
و صوت الديك والزرازير اللي يطرب الأذن
و ريحة الهواء الحلو اللي ينعش الصدر

دشت الأم غرفة بنتها
وبطلت الستاير والدريشة

الأم : شيووخة .. قومي يمه
شيخة تتقلب بفراشها ما شبعت نوم
الأم : شيووخة قومي يالله لا نتأخر ورانا زوارة اليوم
شيخة : ممممم أنزييييين بس شوية بنام !!ـ
الأم : شنو شوية ؟
قومي تسبحي يالله عشان أمشط شعرج لا نتأخر
شيخة : أنزين كاني بقوم

تطلع الأم من الغرفة
تروح تتجهز حق الزوارة لبيت أبوها
شيخة عمرها الحين 8 سنوات


زوارة بيت الجـد ::

الأم تقعد مع أبوها و عمتها و تسولف وياهم

و شيخة تلعب مع ولد عمها نصور اللي أكبر منها بسنتين

شيخة : نصوور أبي ألعب شي ثاني غير الجنجفة
نصور : ممممم تبين نلعب مونوبولي ؟
شيخة : لا ما أحبها أنت كله تفوز علي
نصور : ههههههههههههه أنا أعلمج عليها بس أنتي ما تفهمين
شيخة : قول أنك تعلمني غلط عشان أنت تفوز هااا ؟
نصور : ههههههههههه لا مو قصدي
أنزين شرايج نلعب تيل بالحوش ؟
شيخة : يلا خل نلعب

و يروحون للحوش و طبعا نصور عنده تيل واااايد

شيخة : نصور ليش عندك تيل وايد ؟
نصور : أنا أحب التيل عشان جذي أبيهم يكثرون
شيخة : أنا ودي يكون عندي تيل
نصور : أنتي ألعابج كلهم مواعين و بنات و بروي
شيخة : ههههههههه أحسن أنا أحب جذي
نصور : أقول شيووخ تدرين شنو هذا اللي داخل التيلة ؟
( طبعاً يأشر بإيده على فقاقيع الهواء اللي داخلها )
شيخة : لا !! شنو هذا ؟
نصور : هذول عيالها !! ـ
شيخة : شنووووو ؟؟؟
نصور : أقولج عيالها
شيخة : ( مصدومة ) .. أنزين شلون يطلعون منها ؟؟
نصور : لازم تزرعينها مع الزرع عشان يطلعون !!ـ
شيخة : أنت من صجك تتكلم ؟؟؟
نصور : إي والله تعالي أعلمج

و يروحون الحوش الثاني اللي فيه أحواض الزرع

نصور : شفتي الحوض هذا ؟
شيخة : اي .؟
نصور : اهني أنا أزرع التيل ملوتي .. ما شفتيهم شكثرهم ؟
شيخة : امبلى أشوفهم .. بس شلون تزرعهم ؟
نصور : أدفن التيلة بالرمل جذي .. و أرش عليها شوية ملح و أسقيها ماااي كل يوم
شيخة : ماي و ملح ؟؟؟
نصور : إي لازم عشان يطلعون عيالها منها
و هذا أنا جدامج راح أزرع التيل و إذا ييتي بالزوارة الياية أنطلعهم سوا
شيخة : أوكي يلا راوني شتسوي

يقوم نصور و أييب اربع تيل و يدفنهم بالتراب جدام شيخة
و يرش عليهم ملح شوي و يسقيهم مااااي
شيخة مو مصدقة عيونها بس تبي تشوف نهاية التجربة

نصور : هذا أنا خلصت و زرعتهم .. بس هااا لا تقولين حق أحد !!؟
شيخة : يعني هذا سر ؟
نصور : إي ما نبي أحد يعرف و يسوي مثلنا
شيخة : اوكي محد راح يدري .. بس متى يطلعون عيال التيلة ؟
نصور : يبيلها جم يوم أسقيها ليما يطلعون كلهم
شيخة : لا أطلعهم من التراب إلا جدامي المرة الياية
نصور : أكيد أبيج تشوفينهم بنفسج


طلعت أم شيخة للحوش و شافتهم يلعبون بالتيل

الأم : شيووخ يالله بنروح البيت
شيخة : إن شاء الله كاني ياية
نصور مو تنسى .. الأسبوع الياي أنا بشوف التيل بنفسي
نصور : أوكي وأنا بنطرج


ترجع شيخة للبيت مع أمها و بالها مشغول بسالفة التيل
السالفة ما تدش المخ .. بس تستاهل التجربة
فكرت شيخة و فكرت .. وراحت عند أبوها

شيخة : يبه يبه
الأب : هلا أبوي
شيخة : يبه أبي تيل حقي
الأب : تيل ؟؟ ليش ؟
شيخة : بس أبي ألعب فيهم
الأب : ممممم ان شاء الله بس بعدين أشتري لج
شيخة : يبه مو تنسى ترى أبيهم من صج
الأب : ميخالف إذا فضيت أروح أشتري لج

شيخة حست أن أبوها يماطل ما وده يشتري لها
لأنها تدري ألعابها وااايد ما شاء الله


و يمر الأسبوع ثقيل و شيخة كل يوم تفكر
يا ترى التيل عند نصور زادت و الا لا ؟ ! ؟

و بيوم الزوارة :

شيخة : يلا نصور خل نلعب بالحوش تيل
نصور : يلا أمشي
الأم : شيخة .. صيري عاقلة و بدون ركض
شيخة : إن شاء الله يمه
الجد : خليهم يستانسون بالحوش و يلعبون
الأم : أبشر يبه بس هذي شيطانة تحوس و أنا ما أبيها تصير جذي
الجد : اليهال ما يستانسون إلا بالركض و الحوسة
خليهم على راحتهم بسكم من الحكرة
الأم : إن شاء الله يبه على أمرك


وبالحوش ـ

شيخة : نصور نصوووور
نصور : هااا
شيخة : قولي شصار بالتيل ؟
نصور : إي يلا نشوف جم صاروا الحين
شيخة : يلا بسرعة

و يروحون الحوش الثاني و بالتحديد عند أحواض الزرع
بدأ نصور بالحفر و يطلع التيل وحدة وحدة و شيخة تعد

شيخة : امبيه أكثر من 12 تيلة !! ـ
نصور : هااا صدقتيني و الا لا ؟
شيخة : إي مصدقتك .. بس شلون جذي ؟
نصور : قلت لج السر بالماي و الملح
شيخة : اي صح قلت لي

قاموا يغسلون التيل عن التراب و كملوا لعب
بس شيخة للحين مصدومة و تبي تصدق السالفة غصب

شيخة : نصور
نصور : هااا
شيخة : أبي أسوي مثلك
نصور : مثلي شلون ؟
شيخة : أبي أزرع تيل !! ـ
نصور : هههههههههههههههه ليش ؟
شيخة : أبي يصير عندي تيل وايد مثلك
نصور : خلاص أزرعي تيل في بيتكم و شوفي
بس هااا مثل ما علمتج لا تنسين الماي و الملح
شيخة : لا ما نسيت

هالمرة شيخة راحت عند أمها بالصالة تبي تعرف متى يردون البيت
و طبعاً عارفين ليش

و بالبيت :

شيخة مصرة على أبوها يشتري لها تيل
و ظلت تحن لما شرى لها كيس صغير
و أهي مستاااانسة أخيراً صار عندها تيل
مو بس وناسة .. السالفة فيها تحدي
شيخة تبي تيلها يصيرون أكثر من تيل نصور
و فكرت من باجر الصبح تزرع التيل بحوض الزرع


و من الصبح قامت شيخة و تريقت و على طول للحوش
أبو شيخة حاط أحواض نباتات زينة بالحوش الخلفي
عشان الشمس تكون قليلة على الزرع وما ييبس
ظلت شيخة تفتر تبي حوض زرع فاضي بس ماكو
و خايفة تطلب من أبوها حوض و يسوي لها سالفة


شيخة : وللليييه الحين وين أحط التيل ؟
ماكو إلا أزرعهم مع زرع أبوي

و دفنت التيل تحت النبتة و وزعتهم على الأحواض
لأنها تبي شغل سريع و تبيهم يكثرون
يابت الماي عشان تسقيهم .. فجأة تذكرت شي ناقص

الملح !!!!

شلون تبوق ملح من المطبخ ؟

راحت للمطبخ تبي تاخذ ملح .. بس تفاجأت أن أمها قاعدة تطبخ الغدا

الأم : شيوخ شفيج ؟
شيخة : لا ماكو شي بس أبي اشرب ماي

شربت ماي و أنحاشت

شيخة : الحين صج وهقة شلون أخذ الملح ؟؟

قامت تراقب بالصالة .. و تنطر أمها تطلع من المطبخ
عقب ساعة طلعت الأم من المطبخ و راحت غرفتها
شيخة ركضت للمطبخ و باقت ملح ناعم بإيدها و على طول للحوش
ذرت الملح على كل حوض و بالتحديد مكان التيل
و سقتهم ماي واااايد

و تمت على هالحال طول الأسبوع مغامرات على بوق الملح
وترشه على التيل و تسقيهم ماي
و في نهاية الأسبوع و بيوم الزوارة

شيخة : نصوور نصووووور ( وأهي مستانسة )
نصور : هااا
شيخة : ترى زرعت تيل عندي بحوض الزرع : )
نصور : صج ؟
شيخة : إي والله و كل يوم أسقيهم ماي و أرش ملح
نصور : تمام .. ومتى تبين اطلعينهم ؟
شيخة : باجر الصبح ان شاء الله
نصور : أنزين عديهم و علميني جم صاروا
لأن التيل عندي صاروا 30 تيلة
شيخة : 30 .. أمبيه أنا توني بس 12 تيلة
نصور : ميخالف اذا طلعوا عيالهم راح يكثرون
شيخة : إي ان شاء الله يصير عندي واااااااااااايد

عدت الزوارة على خير و ردت شيخة بيتهم و أهي مستانسة
و متفائلة أن باجر راج يكون يوم مميز
ومن باجر الصبح
شيخة راحت للحوش ركض تبي تعد التيل
طلعتهم من الحوض و حطتهم بالسطل الصغير مالها
و قامت تعد و تعد
شيخة : هذول بس 12 تيلة !! ..
يعني ما ولدت ؟؟؟؟؟
و الا المشكلة من زرع أبوي ؟؟؟
شنو الحل ؟؟؟!!ـ
خل أزرعهم مرة ثانية و أنطرهم أسبوع ثاني و أشوف

و يمر الأسبوع الثاني و هالمرة قررت أطلعهم قبل الزوارة
و الصدمة كانت أقوى
التيل نفس العدد ما تغير ولا زاد !!ـ
عصبت شيخة و قررت تتفاهم مع نصور على الموضوع

و بالزوارة

شيخة : نصووووووووور ( و اهي معصبة )
نصور : هاااااا شفيج تصارخين ؟
شيخة : أنت تجذب علي ؟
نصور : بشنو ؟
شيخة : لا تلف ولا تدور علمني الصج .. التيل يولدون و الا لا ؟
نصور : ههههههههههههههههههههههههههههههههه
شيخة : (و أهي معصبة حدها ) اي تضحك هااااا ؟
نصور : ههههههههههههههههههه أكتشفتي السر صح ؟
شيخة : إي أكتشفت لعبتك .. شكو تقص علي ؟
نصور : كنت أتغشمر وياج ههههههههههههه
شيخة : مالت عليك خليتني كل يوم أسقيهم و أجابلهم
و أخر شي تطلع جذبة .. أنا أراويك
نصور : ( و أهو منسدح من الضحك ) عادي عادي يبه كلها غشمرة
شيخة : مرة ثانية ما ألعب معاك .. أنا رايحة عند أمي
نصور : هههههههههههه مردج بتلعبين معاي


شيخة عصبت من صج و حست أنها غبية جدام نصور
و بالسيارة و هم رادين للبيت كانت أم شيخة تسولف مع أبو شيخة
و دار هالحوار

الأب : شيوووخة استانستي اليوم ؟
شيخة : لا تهاوشت مع نصور
الأب : أفاا ليش ؟
شيخة : قص علي باللعب
الأب : ههههههه يا حليلكم .. المرة الياية أنتي قصي عليه
شيخة معصبة ما ترد ولا تضحك

الأب : تصدقون ؟؟
الأم : شنو ؟
الأب : الزرع اللي زرعته بالحوش الخلفي مادري شفيه
الأم : شفيه يعني ؟
الأب : مادري فجأة صار أصفر و نشف !!ـ
مع أني أسقيه كل يوم ماي حلو و أداريه !!ـ
الأم : يمكن من الشمس و الجو حار بعد
الأب : كل شي جايز

و شيخة بالعة السالفة و ساكتة لأنها عارفة السبب
و ما تقدر تعترف فيه
يكفي أن مصنع تفريخ التيل طلع مشروع فاشل
خصوصاً أنها ما درست الجدوى قبل بداية المشروع


أتمنى أن القصة عجبتكم
و لا تنسوني بالتعليقات
عيدكم مبارك .. و عساكم من عواده
و كل عام و أنتوا بألف خير

رمضان

السلام عليكم ورحمة الله

ملأ الله قلوبكم عزماً
و جعل لكم في الفردوس اسماً
ومن كل خير قسماً
فــ شعبان شهر فلاح
و رمضان عطره فاح
عسى أيامكم كلها أفراح
و كل أحزانكم تنزاح
الله يبلغكم رمضان وأنتم طيبين
وفي التراويح و التهجد مجتمعين
ويتقبل الله منا ومنكم أجمعين
ويعتق من النار جميع المسلمين


أول شي أحب أبارك لكم بالشهر الفضيل
مبارك عليكم الشهر و عساكم من عواده

ثانياً أعتذر عن انقطاعي الفترة الماضية
والسبب صعوبة التصفح و ضعف الاتصال بالنت
على شوية ظروف شخصية
بس إن شاء الله راح أحل هالمشكلة
و راح أنزل بوست يديد و أتمنى يحوز على إعجابكم
و أقول للجميع .. إني أحبكم في الله

رسالة خاصة
داركنس .. خروفة
ألف الحمد لله على سلامتكم و عودتكم للمدونات
وعسى الله لا يحرمني منكم

رسالة خاصة جداً
داركنس .. أحبج حيل وما أتخيل حياتي بدونج

إلى اللقاء في البوست القادم

هل انتهى دور الأم ؟؟

ظاهرة انتشرت في كل مكان
في كل ديرة
ظاهرة كانت في الزمن القريب شبه معدومة
أو بمعنى أصح غير مستحبة
احترت شلون أوصف هذي الظاهرة
و احترت وأنا أبحث لها عن سبب
وكلما حطيت السؤال
أتفاجأ بجواب مـر
بس هم ما أقدر أشوفها وأسكت عن التعليق

* * *

بس عشان توصلكم الظاهرة بصورة واضحة
اخترت لكم أمثلة من الواقع
ما أقول لكم إن الأمثلة منقولة عن فلان أو فلانة
هذي مرت علي و عشتها شخصياً



أخليكم مع الأمثلة
و أترك لكم الحرية بالرد على الموضوع
لعل و عسى نلاقي لها حل مـجـدي



*****




في يوم من أيام الربيع
كنت رايحة مع أخواني الصغار لحديقة في إحدى المناطق
ومعاي بنات عمي
و الحديقة هذي كان فيها خيمة
ومنظمين فيها سحب على جوائز
بنت عمي دشت الخيمة و قعدت في الصف الأمامي
عشان معاها كروت السحب
وأنا قعدت بالصف الأخير بس عشان أتطمش على الناس
و لأن الخيمة ما زالت خالية
والناس بعدهم ما تجمعوا



لقيت بالصف الأخير أكثر من خادمة
ومع كل خادمة عربانة فيها ياهل رضيع
أو ياهل بعمر سنة أو سنتين
وطبعاً ما يحتاج أقول أن الاجتماع هذا مو خالي من الهذرة
وإذا شفتوهم و هم يتكلمون
جنهم يحلون مشكلة الشرق الأوسط
و تاركين اليهال .. اللي يصيح و اللي يطيح

..



لفت انتباهي ياهل عمره تقريباً سبع شهور أو ثمانية
كانت الخادمة المسؤلة عنه فلبينية
الياهل بالعمر هذا معروف شنو نوع الأكل اللي ممكن ياكله
بس صاحبتنا " مس جومينا " شارية للولد شيبس
شيبس اللي أهو بطاط مقلي نفس اللي في مطعم ماكدونادز
و مس جومينا شارية حق عمرها سفن أب
وتعطي الياهل عود بطاط و تخليه ياكل
و أهي تكمل سوالف و تشرب السفن




شدني صوت الياهل و أهو يناديها ويأشر بإيده الصغيرة
يقول : هم هم .. هم هم
أنا ظنيته يوعان و ظليت أراقب تصرف جومينا
قامت و عطته عود بطاط ثاني
الياهل مص العود و قطه بالأرض
و رجع يأشر بإيدينه الثنتين
إيد على حلجه و إيد يأشر عليها يعني عطيني
هم هم .. هم هم .. ويأشر
هم ردت و عطته عود بطاط
والياهل هم قط العود بالأرض مرة ثانية
أهي طبعاً ما تحملت هالتصرف منه
جان تطقه على إيده و تهاوشه
أنا هني فار دمي بغيت أذبحها



قمت وصرخت عليها :
(أكلمها بالإنجليزي)


أنتي خبلة ؟؟
ما تشوفين الولد عطشان ؟
ما تشوفينه من مساع يأشر لج ؟؟
تعطينه بطاط كله دهن وملح حرام عليج
قومي هاتي له ماي يشرب
....
أهي من الخوف ابتسمت لي وقالت : أوكي مدام
أنا قلت يمكن بتقوم تشتري له ماي صحة
تفاجأت أنها تشربه سفن أب مالها !!!ـ




* * * * *




في زيارة لوحدة من الأهل
كنا متجمعين ما شاء الله جم عايلة بالبيت
وكل عايلة ماخذين خدمهم معاهم للزيارة
والخدم متجمعين بمكانهم المعتاد = المطبخ
والمطبخ عند الخدم مكان تبادل الخبرات
ويا ليته خبرات الشغل والتنظيف و الطبخ .. لا و ألف لا
خبرات العناد و السحـر و البوق و التخريب



أم أحمد تنادي خدامتها :
سونيتا .. تعالي غيري حق سارونه
سارونه = سنتين
سونيتا يت من المطبخ
و نفسيتها بخشمها
لأن فاتها وقت ثمين من حصة تبادل الخبرات
تاخذ سارونه و تروح فيها للحمام ( يكرم القراء )
فجأة نسمع صوت صراخ سارونه
أنا توقعت الأم تنقز تشوف بنتها شفيها ؟


أم أحمد : سونيتا .. شفيها سارونه ؟
سونيتا : ماما ماكو شي



و تسكت سارونه !!ـ




و تردها سونيتا عند أمها و تروح تكمل دروسها بالمطبخ




البنت مو على بعضها
شوي تبجي .. شوي تضحك .. شوي تحن
مو عارفين شفيها
مرة يقولون يوعانة .. ومرة فيها النوم



صار بالليل
و كلن راح بيته
أم أحمد تبدل ملابس سارونه عشان تنام
فصخت البنطلون الجينز
وفصخت الهلاهوب
وفصخت الحفاظة ( تكرمون )..ـ


اهني الأم انصدمت !!!ـ


صراخ سارونه بالحمام العصر كان فيه سبب !!ـ



سونيتا لما ودتها الحمام ( تكرمون )ـ
صبت على البنت ماي حاار
و عشان تتفادى الموقف
على طول لبست البنت ملابسها
ولا كأن شي صار

والأم لقت جلد البنت متسلخ و لاصق بالحفاظة !!!ـ




* * * * *




أم بدر معلمة وعندها ثلاث أولاد ما شاء الله
بدر أربع سنوات
خالد ثلاث سنوات
عزيز سنة ونص


و عندها خادمة حبوبة و طيبة حيل ( ميري )ـ
تمووت على اليهال و تخاف عليهم
و مسؤولة عنهم بالبيت


ميري تشتغل عند أم بدر من أربع سنوات
يعني ربت بدر و أخوانه



في نهاية الأسبوع
أم بدر تزور بيت حمولتها
ومعاها عيالها
العمة تسأل بدر : يمه شلونك ؟
بدر : زينة !!ـ



يسولف بدر مع اليهال هناك بالزوارة
يقولهم عن سالفته لما طلع مع أبوه بالسيارة
وشاف حادث جدام عيونه
بدر : أنا .. أنا .. رحت مع بابا بالسيارة
في سيارة .. يمشي حيل و دعم
بعدين الريال ماتت .. !!ـ



بدر ينادي أخوه خالد
بدر : خلوود خلوود تعالي هني ..!!ـ



تم بدر على هالحال ليما صار عمره 7 سنوات
وبدأ يتعدل لسانه بالمدرسة مع الأولاد
ولا يخفى عليكم أن بدر ذكي ما شاء الله
بس رسب أول سنة بالابتدائية
والسبب ضعف النطق بكلمات اللغة العربية

الأولاد من أهله يتهزون فيه و بكلامه
وكأنه إنسان معقد أو من كوكب ثاني


مسكين بـدر ..


على فكرة


"مسرحية لولاكي وصفت الصورة هذي بوضوح"




*****




أم سلمان عندها أربع بنات ما شاء الله
و عندها خادمة لها سنوات تخدمهم
شانتي شايلة البيت على راسها
لأن الأم موظفة



نورة بنت أم سلمان تدرس بالمتوسط
أول ما تدش من المدرسة و تروح غرفتها
تصرخ بأعلى صوتها
شـاااااااااااانتي
شـــااااااااااااااااااااااانتي تعالي بسرعة



شانتي تيي ركض للغرفة
نعم مدام شنو يبي ؟

نورة : تعالي طلعي لي بجامة من الكبت

شانتي تبطل الكبت و تطلع لها هدومها


نورة تبدل هدومها و تطلع من الغرفة

شانتي تعرف شغلها من غير كلام

تلقى مريول المدرسة على الأرض

الجنطة و الأغراض محتاسة

ترتب الأغراض و تروح المطبخ




أنا سألت نورة .. ليش تخلين شانتي تعطيج ملابسج ؟
.
.

قالت وبكل برود و ضحك
.
.

ما أعرف أطلع ملابسي هههههههههههه

.
.
.


و يقولون ليش البنات يتطــلـقــون بسرعة ؟؟
و ليش البنت ما تتحمل تعيش في بيت الزوجية بدون خادمة ؟؟؟





*****





البنت كبرت وصارت مرة
خوش بنية .. هبة ريح
وراعية بيت
زين و جمال ودلال
وبخت عينه اللي بياخذها
.
.
.



تنخطب البنت و تتزوج
و تشرط البنت على أمها
أن الخادمة تروح معاها بيت الزوجية
و تدور الأيام
و البنت تحمل
والكل يستانس
الأم بتصير يدة و الخوات خالات
و الكل ينطر متى يخلص الشهر التاسع

.
.
.


و تعدي التسع شهور
و تولد و تجيب بنية مثل القمر ما شاء الله
و تقعـد أيام النفاس عند أهلها
بعد النفاس ترجع شقتها مع خادمتها

.
.
.


الياهل وين تنام ؟؟

.
.

سريرها وين محطوط ؟؟

.
.


في غرفة أمها وأبوها ؟؟

.
.


في غرفة بروحها ؟؟

.
.


في الصالة ؟؟

.
.


لا والله

.
.


السرير في غرفة الخادمة ..!!ـ

.
.
.

الأم تنام الليل كله

و الخادمة تعابل بالياهل طول الليل

الياهل يبجي و الخدامة مو عارفة له

الياهل بعد النفاس يعني ما يبيله رضاع ؟؟

ما يبيله عناية و اهتمام ؟؟



تدرون الخدم شنو يحطون بالرضاعات حق اليهال ؟


اللي يحطون كلوركس .. وإلا صابون
عشان الياهل يدوخ وينام وايد

واللي تحط أصبع ريلها بحلجه إذا بجى عشان يسكت
( أعذروني على هالجملة بس والله صارت )


و اللي توكله بايت و أكل مو نظيف




اليهال يصير فيهم تسمم
يودونهم المستشفى
يسألهم الدكتور : الولد شفيه ؟
الأم والأبو : و الله ما أدري شفيه فجأة صار يستفـرغ ..!!ـ




الياهل لما ما يعرف يتكلم
يتهمونه بالغباء أو بالتأخر العقلي




الياهل يكبر و أهو يحب جومينا أو ميري
يناديها كل ما احتاجها
ما يعرف يقول ماما أبد






البنت تكبر و تدخل عش الزوجية
و أهي ما تعرف كوعها من بوعها
ما تعرف شنو مسؤوليتها بالبيت
ما تعرف حقوق الزوج
ما تعرف تربي أجيال .. قصدي ياهل واحد ما تعرف تربيه ..!!ـ
للأسف البنت يبيلها من يربيها من يديد

.
.
.



وفي النهاية


.
.
.


يشتكي المجتمع من عقوق الوالدين ..!!ـ


.
.
.


يااا ناااس .. أنتوا عقيتوا عيالكم قبل ما يعقونكم


.
.
.



والسؤال اللي يطرح نفسه

.
.
.



يا ترى .. هل انتهى دور الأم في الحياة ؟؟

اشـتـقـت لـك

البـارحـة سـهـرانة و أسـامـر الونـّات

ونـّيـت مـن جــمــر الـولـه فـي فـؤادي

......

......
للي غـلاه بجـوف ضـلوع(ن) مايلات

وبـعــروقـي يـنــادي باسـمـه مـنــادي
......

......

أنـاظـر الـوقـت وأحـسـب له الساعات

وش أخـّرك ياللي على الـروح بـادي ؟

......

......
صـرت أحـتـريـك باللـيـالي الطـويلات

أطـلـب لـك السـلامة مـن رب العـبـادي

......

......
ويـا مـا على طـاريـك هـلـيـت دمـعـات

وأخـفـيـتـها لأجـل خـاطـرك بالأيــادي

......

......
ولا تحـسـب أن شـعوري لك مجاملات

مجـنـونة وإحـسـاسي فـيك غـير عـادي

......

......
لـيـتـك تـجي وتـشـوف شـيـخـة البـنـات

حـال(ن) هـزيل و لـون(ن) حيل غادي

......

......
وقـل مـتى أشـوفـك مـن بـعـد الـغـيـبـات

ومـتى يـهـلْ وسـمـك وأصـيـر له وادي

......

....

..

.

أشتقت لك

..

حـنـيـن الـشــوق

الـبــــريــــد

حـبـيـبـي

بأســمى معــاني الحــب أنـاديــك

وبـأرق مشـاعر الود أنـاجيــك

و مـن نــافـذة العـواطـف

أطـل عـلـيـك بــهــدوء

لأرسـم على شفتيــك

أحلى ابتســامة

وأسـمعــك

أروع النغـم

قد تخـاطـب قلـبي وقلـبك

قبل أن تتخـاطب شفاهنـا وعقولنـا

انجذب القلبان نحو بعضـهما بقـدرة إلهـية

كانا كـقـلـب واحــد قد انشق نصفيــن

يشـعـر كل نصـفٍ بالآخـر قـبل أن يبـوح

قـلبي سبقني إليــك

ليستمع إلى أسـرارك ومشـاعرك

أفتح بريدي

قبـل أن تصـلني رسـالتك

قـلـبي الذي

يشعر برسالتك وأنت تكتبـهـا

ويشعر بها وأنت ترسلـهـا

ويفرح بها عند وصولـهـا

كـطـفـل .. مسـرور بلقـاء أمّـه

نـعـم

قـلـبـك أمـي وأبـي

أنـت أسـرتـي

أنـت دنـيـتـي

أنـت كونـي

أنـت مُـلـهـمـي



أمــا أنــا


فكـم عـانـق قـلـبـي العــذاب
و كـم أبـكـت الدنـيـا عينـاي


ولـكـن


حـبـّي لك أفـقــدني الصــواب
وصـار اسـمـك بلـسـم شفتـاي


أمـنـيـتـي


أن نـكـون كـقـصـة في كـتـاب
أقـرأه .. ثـم أحـضـنـه بـيـداي


أمـلـي


أن أسـمـع طـرقـك للـبـاب
أتيت حبيـبي في رجــواي


عـشـقـي


أكتفي بهذا القدر من الكلام

فمهما تكلمت

لن أصف مدى شعوري تجاهك

شعوري كـما البـحــر

ينتهي بجفاف آخر قطرة منه

بكـل نبـضـة من قـلـبـي

أحـبـك

الكويت الحبيبة

السلام عليكم

أشتقت لكم حيييييل



أحب أهني كل أهل الكويت

وأهني الدنيا كلها

كل عام وأنتم بـ 10000000000 خير

وعسى الله يديم علينا نعمة الأمن والأمان

وكل سنة نشوف الكويت تعلى و تتقدم أكثر

وكل سنة نعطيها من دمنا مثل ما عطتنا


الله يحفظج يــا ديــرة العــز



تحياتي لكم


حنين الشوق للكويت

يوم الماراثون العالمي ..؟؟

السلام عليكم ورحمة الله وبركاته

أسعد الله أيامكم وأدام أفراحكم

أشتقت لكم حيل

وحبيت أعبر عن شوقي لكم

بقصة يديدة من قصص شيوخة

أتمنى تنال أعجابكم

= = = = = = = =

شيخة من جديد
كبرت و كبر معاها حلمها باللعب على طول
عمرها الحين ست سنوات
تدرس بالصف الأول الابتدائي
ما شاء الله عليها متفوقة وطالبة مثالية
كل المعلمات يحبونها

في يوم من أيام الدراسة
قررت المدرسة تطعيم الطالبات
وطبعاً كل صف يوقفون بالدور مع معلمتهم
و يمشي الطابور إلى غرفة الأخصائية الأجتماعية
عشان الكل ياخذ التطعيمات
طبعاً لازم الطابور يمشي بشكل مستقيم للأمام
يمر على الممرضة وتعطي البنت تطعيمة الشلل
وهي عبارة عن قطرات توضع بالفم
والتطعيمة الثانية عبارة عن إبرة بالذراع

شيخة واقفة بالطابور ما تدري شسالفة
تسولف مع البنت اللي معاها وتضحك
شي طبيعي ما دام الطابور يمشي للأمام
واللي في نهاية الطابور ما يشوف اللي بمقدمة الطابور
لما بدأ الطابور يقترب أكثر من الطبيبة

طلع صوت

شد انتباه شيخة ..!!ـ

صوت أنين
صوت بكاء خفيف
بدأ قلب شيخة يخفق بسرعة
يا ترى شنو اللي خلى هالبنت تبجي ؟؟
اقترب الطابور أكثر
وشيخة بدت ترتجف من الخوف
ابتسام كانت جدام شيخة بالطابور
لما وصلت ابتسام للممرضة
قالت لها : أفتحي حلجج وأبلعي !!ـ
شيخة تقول بينها وبين نفسها
السالفة كلها نقط بالحلج ؟؟
عادي ... شنو المشكلة ..!!ـ

خلصت ابتسام و مشت
شيخة قربت من الممرضة

الممرضة : أفتحي حلجج و أبلعي أوكي
شيخة بطلت حلجها و يا ليتها ما بطلته
ما قدرت تبلع الدواء من مرارته !!ـ
شيخة : ووع طعمه مر
بس أشوى خلصت من دوري والحين بروح للصف

المسكينة ما تدري إن باقي لها دور ثاني
لما وقفت ابتسام عند الطبيبة و فتحت إيدها
والطبيبة طلعت الإبرة و أخذت الدواء
شيخة انصدمت

إبـــــــــررررة ؟؟؟؟

لااااااااااااااااااااااااااااااااا

ابتسام تتألم وتبجي بصوت خفيف
شيخة تتلفت
تبي ملاذ تنحاش فيه من هالورطة
الطبيبة تنادي : شيخة تعالي يا حلوة
شيخة تثقل خطواتها بالمشي
و المعلمة تسحبها شوي شوي
تعالي شيخة لا تخافين
شيخة على ويهها علامات الخوف والهلع
تتلفت تبي تشوف الباب وينه
مسكتها الطبيبة وقالت لها هاتي إيدج

شيخة وبأعلى صوتها صرخت

لاااااااااااااااااااااااااااا

مــــااااااااااااااااااااااااااابي

الطبيبة : شفيج يا شيخة ترى الإبرة ما تعور !!ـ
شيخة : أقوووووول لكم ماااااااااااااااااابي

وبدأ صراخها يرتفع
و البكاء يرتفع أكثر
والمعلمات طلعوا من غرفهم ركض على بالهم مصيبة صارت

الممرضة قالت للطبيبة
إذا البنت ما تبي بإيدها .. عادي عطيها الإبرة من ورى !!ـ

شيخة : من ورى ؟؟ لااااااااااااااااااا

لاااااااااااااااااااااااا

لااااااااااااااااااااااااااااااااا


و تحاول تتخلص من إيدين المعلمة
وفجأة قدرت تنحااااااااش
والمعلمة تركض وراهااا
المعلمة : شيخة ردي خلاص
شيخة : لاااااا مـــا أبـــيـــكــم .. أبــــــــي أمـــــــــــــي
المعلمة : خلاص ما راح أنطعمج بس ردي
شيخة تركض أسرررررع
وتدش في صف وتطلع من صف ثاني

دشت صفها وراحت تنخش بين البنات
شيخة : ابتسام عفية خشيني أهي أهي أهي ( والدموع أربع أربع ) ـ
ابتسام : شيخة ترى الإبرة ما تعور
شيخة : لااااا ما أبي إبررررة
خـــشــــووووني عنهم

فجأة دشت المعلمة للصف
وشيخة من الخوف انخشت تحت الدرج

المعلمة : شيخة تعالي خلاص ماكو تطعيم بس تعالي

شيخة تبجي تحت الدرج
والبنات منهم اللي تبجي من أثر الألم
ومنهم اللي تضحك على الموقف
قربت المعلمة من درج شيخة
شيخة تسمع خطوات المعلمة وهي ماشية صوبها
قلبها بيوقف من قوة الخفقان
كأن الموت ياي لها

وبلمح البصر

تطلع شيخة من تحت الدرج
وعلى باب الصف تنحااااااااش
المعلمة تطلع وراها ركض
والمعلمات يركضون وراهم ... شسالفة ؟؟
شيخة ما لقت منفذ إلا الساحة الكبيرة تنحاش فيهاا
لما تعبت المعلمة وانقطع نفسها قالت

المعلمة : شيخة تكفين خلاااااااااص
والله ما راح انغزج الإبرة خلااااااااص
بس ردي للصف عشان نكمل الدرس

شيخة ما صدقت المعلمة إلا لما شافت الطبيبة طلعت من المدرسة
هني تطمنت أن ماكو تطعيم

ردت للصف وأهي مستانسة و دموعها أربع أربع
خووش وناسة !! لوووول

دشت للصف والابتسامة شاااقة الويه
والدموع على الخدود
تقول للبنات .. خلاص ما راح يقزوني إبرة
البنات مستغربين !!؟

شيخة حققت أنتصار بالمعركة هذي
و كملت يومها بالصف وأهي فرحانة

المعلمة لأنها تحب شيخة حيل
احترمت موقفها و خوفها من التطعيم
بس مو معنى هذا أنها ما راح تتطعم
عشان جذي
المعلمة كتبت خطاب لأم شيخة تبلغها إن عليها الحضور للمدرسة
وشيخة وصلت الخطاب لأمها بس ما تدري شنو فيه

الأم مصدومة : خطاب حضور ولي الأمر !!؟؟
أنتي شنو مسوية بالمدرسة ؟؟
شيخة : والله ما سويت شي
الأم : عيل ليش يبوني أحضر للمدرسة ؟ شنو صاير ؟
شيخة : ما أدري
طبعاً شيخة خايفة تقول لأمها عن اللي صار
وتغسل شراعها بالبيت
والا تحرمها من أي شي تحبه عقاباً لها
نامت شيخة ذيج الليلة وأهي تفكر
يا ترى راح يعلمون أمها باللي صار ؟
يا ترى يجبرونها تاخذ التطعيم بحضور أمها ؟؟
لااااا ما أبي يقزوني جدام أمي
ونامت وأهي خايفة من اللي بيصير باجر

باجر الصبح راحت شيخة للمدرسة كالعادة
دخلت للصف و مشت كعادتها مع البنات
أم شيخة وصلت للمدرسة
دخلت على الأخصائية الأجتماعية
الأم : صباح الخير .. أنا يايتكم بطلب استدعاء من معلمة بنتي
الأخصائية : صباح النور .. بنتج شسمها ؟
الأم : شيخة
الأخصائية : شــــيـــــخــــة !!!! ؟؟؟؟
أنتي أم شيخة ؟؟؟؟
الأم وعلامة تعجب : إي أنا أمها .. شنو صاير !!!؟؟
الأخصائية : بنتج أمس عيت تاخذ التطعيم
الأم : ليش ؟ وشلون ؟
الأخصائية : بنتج خافت من الإبرة و انحاشت من الصف
والمعلمات طلعوا وراها ركض يترجونها ترد للصف
المشكلة الحين أن بنتج ما تطعمت
الأم : بس شيخة ما قالت لي أن أمس كان تطعيم !!ـ
الأخصائية : الحين لازم تودينها للمستوصف تاخذ التطعيم اللازم
الأم : إن شاء الله بوديها اليوم بنفسي
يعطيج العافية .. مع السلامة


طلعت الأم وأهي مصدومة من الخبر اللي سمعته
وبطريجها مرت على معلمة شيخة
الأم : صباح الخير أبلة سوسن
سوسن : صباح النور هلا أم شيخة
الأم : يعطيج العافية شلونج ؟
سوسن : الله يعافيج .. لا تشوفيني أمس بغيت أموت
بنتكم خلتني أركض وراها بالمدرسة كلها
الأم وأهي مفتشلة : السموحة أبلة سوسن وإن شاء الله بوديها تتطعم اليوم
سوسن : والله بنتج متفوقة و مؤدبة بس أمس صارت وحدة ثانية !!ـ
وأتمنى اللي صار ما يتكرر
الأم : ولا يهمج أبلة سوسن إن شاء الله ما لج الا طيبة الخاطر
سوسن : حياج الله أم شيخة وفرصة سعيدة اللي شفتج اليوم
الأم : وأنا أسعد .. (هين .. وين أسعد عقب هالفشيلة) ـ
مع السلامة
سوسن : مع السلامة


راحت الأم للبيت و هي مفتشلة من اللي صار
لما صار الظهر و يت شيووخة من المدرسة
دشت البيت مستانسة
شيخة : يمه يمه اليوم رسمت حديقة والأبلة حطت لي نجمة على الكراسة
الأم : وشخبار الإبرة ؟
شيخة من الخوف ويهها قط ألوان
شيخة : هاااااااا !!!؟
الأم : ما ركضتي اليوم بالمدرسة ؟ وخليتي المعلمات يركضون وراج ؟
شيخة : يمه اليوم ما طلعت من الصف بس بالفرصة
الأم : وأمس ركضتي وخليتي الكل يركض وراج صح ؟؟؟
واليوم فشلتيني جدام المعلمات والإدارة

شيخة ما قدرت ترد على أمها من الخوف
وتمت ساكتة
الأم : اليوم أوديج المستوصف تاخذين الإبرة .. مفهووم ؟
شيخة : انزين يمه
شيخة استسلمت للأمر الواقع ما دام الأم أصدرت أوامرها
وراحت لغرفتها وأهي متضايقة

العصر
طلعت الأم مع شيخة وأبوها للمستوصف
دخلت الأم على الطبيبة وقالت لها أبي تطعيم حق بنتي شيخة
الطبيبة : ما تطعمت بنتج بالمدرسة ؟
الأم : لا
الطبيبة : لا يكون بنتج اللي أنحاشت و المعلمات ركضوا وراها ؟؟
الأم وأهي منصدمة : هاااا ؟؟ إي هذي بنتي
( سالفتنا مسرع ما طشت يا فشيلتي )
الطبيبة : خلاص الحين نعطيها التطعيم

خلصت المهمة على خير
شيخة ما قدرت تقول شي

لأنها تخاف من أمها خوووف شديد

وتمر الأيام
وفي آخر السنة
وبالتحديد يوم الشهادات
الأم حضرت للمدرسة مع بنتها شيخة
طبعاً شيخة طلعت الأولى على الدفعة (ما شاء الله) ـ
و أخذت جائزة الطالبة المثالية
والمعلمات يباركون لأم شيخة

المعلمة : والله شيخة تهبل و محبوبة ومتفوقة بس لوما هذاك اليوم اللي حفلت فينا بالتطعيم هههههههه
المعلمة الثانية : أي والله يا حلاتها بس لوما هذاك اليوم
الأم : تبتسم وأهي مفتشلة .. (خليتينا حديث الساعة يا شيووخة) ـ

للأسف صارت شيوخة مضرب المثل بالخوف من الإبرة
حتى اليهال بالبيت يعايرونها
بس أهي ما تهتم بالكلام اللي ينقال
لأنها تحس بانتصار لما قدرت تمنع التطعيم
مع أن المعلمات عجزوا عن إجبارها

بس تدرون عاد ؟؟

شيخة كان طموحها تدرس الطب
وتصير طبيبة معروفة
حتى ألعابها لما تشتريهم
تشتري أدوات الطبيب
سماعة – عدسة مكبرة – وأهم شي .. إبرة لووول
وما زالت محتفظة بالألعاب هذي
وتعيش على ذكرى

يوم سباق الماراثون العالمي للتطعيم

أشكركم على المتابعة
ولنا لقاء وياكم بقصة يديدة


لكم أجمل تحياتي

حـنـيـن الــشــوق

السابع من فبراير

السلام عليكم ورحمة الله وبركاته

صبحكم الله بالخير
ومساكم الله بالرضا والسعادة

في البداية
أشكر حبيبتي و توأم روحي

Darkness

على تصميم خلفية البلوق
تسلم لي الأنامل وراعيتها
وعسى الله يعتق إيديج من النار
وعساني ما أنحرم منج يالغالية

ثانياً
أشتقت لكم حيل
وحبيت أشكر كل من تابع مواضيعي السابقة
وشجعني أكمل المشوار
وأنا ما أستغني عن دعمكم و ردودكم

وأعتذر عن الانقطاع بسبب ظروف النت حالياً

= = = = = = = =

في مثل هذا اليوم

اليوم السابع من فبراير

طلع على الدنيا شخصين

من دم واحد

ربي خلقهم روح من روح

عشان يصيرون روح وحدة

البنت طلعت على الدنيا في السابع من فبراير

وأمها اللي يابتها

هم طلعت على الدنيا في السابع من فبراير

سبحان الله على المصادفة

بين الأم وبنتها 22 سنة

الله يعطي هالأم طولة العمر

ويحفظ لها بنتها ويرزقهم السعادة والستر

في الدنيا والآخرة

وكل من يقرأ هالبوست

اللهم آمين

البنت أهي

حنين الشوق

والأم أهي

أمها

وكل عام وأنتم للجنة أقرب

وكل عام وأنتم بخير

وتحياتي لكل متابع

وإلى اللقاء

أم ســعــود

طلعت على الدنيا طفلة مدللة
يحبني الكبير والصغير
العمات والخالات يتنافسون على دلالي
العمام والخوال يتسابقون على مداراتي

وطبعاً ما أنسى أمي وأبوي اللي يخافون علي من الهواء الطاير
وما أنسى جدتي أم أبوي اللي أجابلها وتقص لي القصص

وما أنسى عمتي (عمة أبوي) أم سعــود

آآآآه يا قلبي عليج يا عمة
العمة ما كتب ربي لها الزواج ولا الذرية
بس لأنها ربت ولد أخوها وكان اسمه سعود
الكل صار يناديها أم سـعـود

أم سعـود عصبية حيل
ولكنها على قولة المثل كأنها مطر صيف
يعني تعصب وترعد وتبرق عليك
وما يصير دقايق إلا وتجي تضحك
وقد نست اللي قالته واللي صار !! ـ


أم سـعـود تمووت على اليهال
ميزها ما يخلى من الحلاو و الجاكليت والبرميت
والياهل ما يطلع من عندها إلا وهو مستانس


ما نسيت طعم الجاكليت أبو بقرة اللي لون غلافه أحمر وأصفر
كل ما ذكرت شكلها وهي تفتح الميز (الكبت)..ـ
وتقول لي تعالي أعطيج شرط

واااااااااي شنو هالسعادة اللي تنزل علي ؟!؟
شنو سر هالسعادة ؟

ما أدري ..ـ
بس أحس أني ملكت الكون بقطعتين جاكليت و جم حبة برميت

يمكن تستغربون !! بس هذا واقع شعور الياهل
والدليل إني الحين ما تخلى جنطتي من الحلاو لليهال
وأشوف سعادتهم إذا عطيتهم حتى لو قطعة وحدة
وأتذكر سعادتي اللي مالها مثيل



في يوم من أيام الصيف الحارة
أتذكر عمري كان 9 سنوات
شعري طويل و كانت أمي تسويه لي عجفتين ( ظفيرتين ) ..ـ
وأمي ما كانت ترضى أني ألمس شعري لا بمشط ولا غيره
وكانت هي بنفسها تسرحه لي ومرات عمتي الثانية

المهم في ذاك اليوم
قمت الضحى من النوم ونزلت للحوش
طبعاً الشعـر محيوس والقذلة طايحة على الويه
لقيت العـمــة أم سـعـود قاعدة بظلال البيت
يمها غوري الجاي و أستكانتها
وبحضنها صينية فيها عيش قاعدة تنقيه

أروح للصالة أشوف الريوق محطوط و مغطينه عن الذبان
مثلكم عارف بالصيف شلون يكثر الذبان بشكل مو طبيعي
أشيل غطا السفرة وأشوف الريوق
حليب .. درابيل .. حلوى .. رهش .. بقصم
سفرة ملكية وربي فيها ما لذ وطاب
الله يديم هالنعـمة ويحفظها من الزوال

أسمـّي بالرحمن وآكل ريوقي
وبين لقمة والثانية أبعد شعري عن عيوني
وإلا أكش الذبان عن ويهي ^_^
أحمد ربي وأغطي السفرة وأقوم


أطلع للحوش مرة ثانية
ألاقي العـمة ما زالت في مكانها
تشرب الجاي وتنقي العيش
أقرب عندها وأقعد على الحصير


أنا : قوة عـمة .. صبحج الله بالخير
العـمة : هلا .. صبحج الله بالنور أبوي أنتي
أنا : شقاعدة تسوين ؟
( يعني شنو ؟ مو شايفتها قاعدة تنقي العيش ؟ )
العـمة : أنقي العيش من الشلب والطين والوصخ
أنا : ليش ؟
( مسوية ذكية وأبي أعرف السر )
العـمة : عشان لا بغينا نطبخه إلا هو نظيف
أنا : إي صح صح
أبتسم وأقول ... أنزين أبي أنقي وياج
العـمة : هاج الصينية و أنتبهي لا تخلطين المنقـّى مع اللي ما تنقـّى !!ـ
أنا : إن شاء الله عمة

وبديت أنقي العيش ..
طبعاً بالبداية كان صعب علي
بعدين تعودت عليه ولقيته شي ممتع
بس اللي مزعجني شي واحد !!ـ

تتوقعون شنو ؟؟
ما يبيلها تفكير ... صح ؟

الذبان إذا لزق على الويه ما يطير
وتخيل مع الحر و العرق والشعر اللي على الويه متلزق
يكملها الذبان اللي يتنقل من الويه إلى الذراع إلى الرقبة من الخلف
أنا هني طنقرت وقمت أنافخ

أنا : أووف .. وأكش الذبانة بإيدي
العـمة : ويه شفيج ؟
أنا : الذبان أذاااني ..!.ـ
العـمة وهي تضحك بهدوء : عادي شنو المشكلة ؟
أنا وبعصبية : لوع جبدي أبي أشتغل مو قادرة أركز !!ـ
العـمة : شوفيني أنا ما يأذيني الذبان !!ـ
لفيت عيوني عليها و تفاجأت
فعلاً ما كان يزعجها الذبان مثلي !!ـ

وسألتها وعلامة تعجب كبيرة على ويهي
أنا : ليش بس أنا يزعجني ؟
العـمة : أنا عيوز و صايرة سوداء من الشمس
وأنتي بسم الله عليج بياض وحلاة
شلون ما يدودي عليج الذبان ؟

طبعاً أنا من الحياء ما قدرت أرد عليها بكلمة
وكملت تنقي العيش وأنا ساكتة

كلمة العـمة جبرت خاطري و ما صرت أنزعج من الذبان
يعني عززت ثقتي بنفسي لما شفت أني حلوة


مرات لما ألعب بروي بالحوش على الحصير
وتكون هي قاعدة يمي وتشوفني ألعب
وكل ما تحركت أنا .. تطب علي عجايفي الطويلة (ظفائري)
وأنا أبعدها ورى ظهري عشان أكمل لعب
وبكل حركة تطب علي هالظفاير وأنا أعصب زيادة

أنا : أووووف يعني شلون الواحد يلعب ؟!!؟
العـمة : شفيج يا بنيتي ؟
أنا : شعري يطب على ويهي وأنا ألعب
مزعجني .. تعبت منه أبي أقص شعري
العـمة : شوفيني أنا .. ما عندي شعر
( وكان شعرها قصير جداً و كاسيه الشيب)
ألتفت عليها وأشوف عجايفها الصغيرة حيل

العـمة وهي مبتسمة : حنوون شرايج ؟
أنا مستانسة : شنووو ؟
طبعاً بهاللحظة تجي في بالي حلول وايد
منها أن العـمة بتقنع أمي تقص لي شعري

العـمة : أتبادليني .. أخذ عجايفج وأعطيج عجايفي !!ـ
أنا وعلامة إندهاش : هههههههههه أخذيهم وفكيني منهم
العـمة تضحك بهدوء : روحي لعبي يا بنيتي
أكمل اللعب وهي تراقبني بهدوءها

= = = = = = = =

الحين وأنا أكتب هالقصة
حسيت بمعنى كلامها
الحين بعد ما صار شعري قصير وكساه الشيب
آآه يا عـمة تعالي شوفي العجايف راحت

الحين أتمنى أسمع كلمتها
(أخذ عجايفج وأعطيج عجايفي)
عشان أقول لها من حقج تاخذينهم
الحين أتمنى الشعر الطويل
اللي يترس الظهر والصدر
دمعتي مو راضية توقف
ولو أبجي من الحين والعمر كله
ما راح أحصل على مبتغاي فيه

= = = = = = = =

زينة البنت شعرها .. وحلاته على طبيعته
بس وين بنات الحين من بنات أول
زمان أول .. أمهاتنا ما يخلونا نلمس شعرنا
يبادرونا بالحناء والدهن على طول
ما نعرف الاستشوار إلا من سنة إلى سنة
حتى بالعيد عجايف
أتذكر أني أفل شعري بس بعرس خوالي
وبعرس الناس عجايف
الحين صار الولد ينافس البنت بالشعر الطويل

والبنت تنافس الريال بالقصير والبوي

الله يذكرج بالخير يا منيرة رفيجة الدراسة أيام الثانوي
لما كانت وياي بالمتوسطة
كنا مثل بعض عجايف وشعورنا طويلة
بس لما ألتقينا بالثانوية
لقيت شعرها أقصر من أول وخفيف ومصبوغ
قلت لها مرة : منيرة .. تذكرين أيام المتوسط لما كان شعرج طويل ؟
منيرة : إي سكتي لا تذكريني .. خبرنا بالشعـر الطويل لما كان على إيدين أمهاتنا
بس لما صار على إيدينا .. لعبنا فيه


صدقت منيرة
أنا عن نفسي لعبت بشعري لما أتلفته
قص .. صبغ .. استشوار على طول
والحين .. أدور على شي يرده لي
بس هيهات
ونصيحتي للبنات الحين
اهتموا بشعركم بالمعقول ترى زينة البنت شعرها

= = = = = = = = =

ما أنسى كلمة العـمة لي
العـمة : جم عندنا بنت ؟؟
أنا : بس وحدة .. وأبتسم لها

إي نعم .. أنا كنت وحدة بنظرها
بالرغم من وجود غيري من الأولاد والبنات
بس حنوون عندها غير
لحد يقول شي عن حنوون
كنت دنيتها .. كنت سعادتها
للحين أحب دهن الورد لأنه يذكرني فيها
أحب الجاكليت الأحمر والأصفر
أحب أسن السكين على الطوفة مثلها
أخذت منها أطباع وايد
دمعتي تنزل من أتفه سبب

أهلي يقولون عني
حتى في مشيتها تشبهينها

لج نفس زولها بالعباية


رحمة الله عليج يا عـمـة
تعلمت منج أشياء وايد
رحمة الله عليج يا الغالية
فقدتج .. والله فقدتج
فقدت دلالج لي
فقدت سوالفج اللي تجبر الخاطر
فقدت غناويج اللي تغنينها علي
فقدت دعواتج لي بكل حزة
فقدت ريحة العـود والورد اللي أشمها بملفعج
فقدت سريرج اللي أحب ألعب عليه
فقدت حزاويج اللي تحازيني فيها بالليل
فقدت ميزج اللي متروس حلاو و برميت
فقدت ريحة أدويتج اللي بدرج الكبت
فقدت ريحة الكركم من أيدج إذا حبيتها
فقدت صوت السكين وأنتي تسنينها على الطوفة
فقدت طلتج علينا الضحى والعصاري
فقدت جاي العصر و القعدة على الحصير
فقدت دمعتج اللي تنزل من أتفه سبب
فقدت اللي تقرأ علي قرآن إذا استمرضت
فقدت اللي تنشد عني إذا غبت يومين
فقدت اللي تبجي علي إذا صار فيني شي
فقدت قلبج الطيب
فقدت حسج المبحوح
فقدتج يا العـمة

رحمة الله عليج رحمة واسعة
وعسى الله يغفر لج ويسكنج الفردوس الأعلى
وأموات المسلمين .. اللهم آمين
ولا تنسوها من صالح دعائكم

حنين الشوق

الــقـــمــر

بسم الله الرحمن الرحيم



أسعد الله صباحكم ومساءكم وجميع أوقاتكم

اليوم راح أنتقل وياكم إلى أسلوب مختلف شوي عن البوست السابق
البوست هذا راح يكون على شكل حلقات
حلقات فيها ذكريات بنت من بنات الرعيل الأول
وفي كل بوست جديد راح تكون لها قصة جديد

..(: وما أبي أطول عليكم

= = = = =



القــمــر



شيخة بنت حبوبة وطيووبة حيل
عمرها الحين 4 سنوات .. متبتبة و خفيفة طينة
يمكن لو أبالغ شوي أقول إن براءة الكون كله فيها

شيووخة بكر أمها وأبوها وأول بنت بالبيت
وطبعا عاشت في بيت حمولة بالفيحاء
مع أربع عوائل ما شاء الله
بس اللي معاها من الأطفال كانوا أولاد
ومن خوف أمها عليها ..
ما كانت تسمح لها تلعب مع الأولاد إلا نادر
وشيووخة تعد الساعات والأيام وتنطر زوارة عماتها
ليش ؟
عشان تلعب مع بنات عماتها اللي هم أكبر منها سناً

هيا و أمينة بنات عمتها اللي في الرميثية
هيا أكبر من شيخة بـ 5 سنوات
وأمينة أصغر من شيخة بـ 9 شهور
عايشة و حصة بنات عمتها اللي بخيطان
عايشة أكبر من شيخة بـسنتين
و حصة أكبر من شيخة بـ 6 شهور بس

شيووخة تحبهم حب عمي
وتنطر اليوم اللي يتجمعون فيه بالبيت عشان يلعبون
لبيدة وإلا حيلة وإلا بروي

بس مرات تتفاجأ من عواشة و حصة أن ما يبونها تلعب وياهم ..!!


شيخة : ليش ما تبوني ألعب وياكم ؟؟

عوااشة : أنتي كبيرة .. والكبار ما يلعبون مع الصغار ..!! ؟

شوفوا من يتكلم !! .. ؟

تدرون ليش يقولون عنها كبيرة ؟

ما يحتاج أشرح .. لأنها متبتبة وأكبر منهم بنية جسم
و هم ضعاف و صعوات على قولة أمهم


وشيخة المسكينة تروح لأمها ركض

شيخة : يمه يمه .. (والدموع أربع أربع .. وتشاهق من البجي)ـ
الأم : شفيج تبجين ؟؟
شيخة : عواشة و حصة ما يلعبوني يقولون أنا أكبر منهم ..!ـ
الأم : ما عليه يمه روحي لعبي وياهم قاعدين يتغشمرون معاج

طبعاً الأم ما تبي تشب الفتنة
خصوصاً أن الجدة وحماتها أم عواشة قاعدين بالغرفة يميع
ولأجل عين تكرم مدينة

وفي يوم من الأيام .. يوم زوارة العمة أم عواشة
البنات يلعبون بالحوش
والأمهات قاعدين بالليوان يشربون الجاي
صار الناس ليل و دشوا الأمهات لدار الجدة و خلوا البنات بالحوش
شيخة و عواشة و حصة يلعبون بروي بالليوان
و الليلة قمرا والجو يهبل

فجأة ..!!ـ

حصة أصابها رعاف .. و الدم سال على ويهها و هدومها

نقزت عواشة ونادت أمها
يت العمة تركض وشالت البنت و ودتها الدار
وحطت لها كمادات باردة

شيخة في ذهول .. تسمرت بمكانها ..!!ـ
أول مرة تشوف موقف جذي ..!!ـ

و على ويهها علامات أستفهااااااام كبيرة ..!؟؟؟

شيخة : عواشة .. شفيها أختج ؟ ليش طلع منها دم ؟؟
عواشة : شنو بعد .. ما تدرين ؟؟
شيخة : لا ما أدري ..!!!؟
عواشة : من مساع وأهي أطالع القمر ..!!ـ
واللي يطالع القمر .. يصب من خشمه دم ..!!!!ـ
تبين يصب من خشمج دم ؟؟
شيخة : يمه .. من القمر ؟؟ لا لا ما أبي ..!!ـ
خلاص ما راح أطالع القمر ..!!!ـ



وتمت شيخة سنوااااات طويلة وهي تخاف أن تنظر إلى القمر ..!!ـ



بالله عليكم .. هذي يسمونها براءة وإلا شنو ؟


أنتظر ردودكم وتعليقاتكم

تحياتي للجميع